#奧仕卡晚安歌單
來自英國嘅樂隊 Glass Animals 對我嚟講係果種 「嘩~搵到呢對嘢嚟聽真係好好彩呀!」類型嘅樂隊。佢哋做嘅係一種森林系/野生系嘅音樂，vocal慵懶而糜爛嘅演繹同神秘暗黑嘅曲風本身已經好配合，令到呢隊樂隊更別樹一格嘅係編曲上合成器嘅運用同埋民族味重嘅節奏將聽眾帶入廣闊，變幻莫測而悠久嘅大自然當中－寧靜，深沉，濃烈，富美感。
聽聞佢哋早期錄音嘅地方係喺森林入面一間塞滿床褥嘅小屋入面，創作主腦(則係個vocalist)係修讀神經系統科學嘅學生，自己性格都係神神經經咁嘅怪人；歌詞創作上佢主張嘅係亂咁填，但係佢啲bandmates會將佢亂咁填嘅歌詞略略琢磨，形成而家亂中有序嘅狀態。
'#Gooey'呢首歌係我第一首接觸佢哋嘅作品，個感覺就係好好聽，同埋會好沈迷，不停咁聽。但係歌詞內容講乜，MV究竟做緊乜... ...無論我研究幾耐都唔係好明。
早唞, 聽日返工加油！
Search